1his ita transactis
nuntiatum est Ioseph quod aegrotaret pater eius
qui adsumptis duobus filiis Manasse et Ephraim ire
perrexit
2dictumque est seni ecce filius tuus Ioseph venit ad te
qui confortatus sedit in lectulo
3et ingresso ad se ait
Deus omnipotens apparuit mihi in Luza quae est in terra Chanaan
benedixitque mihi
4et ait
ego te augebo et multiplicabo
et faciam in turbas populorum
daboque tibi terram hanc
et semini tuo post te in possessionem sempiternam
5duo igitur filii tui qui nati sunt tibi in terra Aegypti
antequam huc venirem ad te
mei erunt
Ephraim et Manasses sicut Ruben et Symeon reputabuntur mihi
6reliquos autem quos genueris post eos tui erunt
et nomine fratrum suorum vocabuntur in possessionibus suis
7mihi enim quando veniebam de Mesopotamiam
mortua est Rahel in terra Chanaan in ipso itinere
eratque vernum tempus
et ingrediebar Ephratam
et sepelivi eam iuxta viam Ephratae
quae alio nomine appellatur Bethleem
8videns autem filios eius dixit ad eum qui sunt isti
9respondit filii mei sunt
quos dedit mihi Deus in hoc loco
adduc inquit eos ad me ut benedicam illis
10oculi enim Israhel caligabant prae nimia senectute
et clare videre non poterat
adplicitosque ad se deosculatus et circumplexus
11dixit ad filium
non sum fraudatus aspectu tuo
insuper ostendit mihi Deus semen tuum
12cumque tulisset eos Ioseph de gremio patris
adoravit pronus in terram
13et posuit Ephraim ad dexteram suam id est ad sinistram Israhel
Manassen vero in sinistra sua ad dexteram scilicet patris
adplicuitque ambos ad eum
14qui extendens manum dextram posuit super caput Ephraim iunioris
fratris
sinistram autem super caput Manasse qui maior natu erat
commutans manus
15benedixitque Ioseph filio suo
et ait
Deus in cuius conspectu ambulaverunt patres mei Abraham et Isaac
Deus qui pascit me ab adulescentia mea usque in praesentem diem
16angelus qui eruit me de cunctis malis
benedicat pueris et invocetur super eos
nomen meum
nomina quoque patrum meorum Abraham et Isaac
et crescant in multitudinem super terram
17videns autem Ioseph
quod posuisset pater suus dexteram manum super caput Ephraim
graviter accepit
et adprehensam patris manum levare conatus est de capite
Ephraim
et transferre super caput Manasse
18dixitque ad patrem
non ita convenit pater quia hic est primogenitus
pone dexteram tuam super caput eius
19qui rennuens ait scio fili mi scio
et iste quidem erit in populos et multiplicabitur
sed frater eius iunior maior illo erit
et semen illius crescet in gentes
20benedixitque eis in ipso tempore dicens
in te benedicetur Israhel atque dicetur
faciat tibi Deus sicut Ephraim et sicut Manasse
constituitque Ephraim ante Manassen
21et ait ad Ioseph filium suum en ego morior et erit Deus vobiscum
reducetque vos ad terram patrum vestrorum
22do tibi partem unam extra fratres tuos
quam tuli de manu Amorrei in gladio et arcu meo
