LIBER GENESIS 5

₁hic est liber generationis Adam

in die qua creavit Deus hominem

ad similitudinem Dei fecit illum

₂masculum et feminam creavit eos

et benedixit illis et vocavit nomen eorum Adam in die qua creati sunt

₃vixit autem Adam centum triginta annis

et genuit ad similitudinem et imaginem suam

vocavitque nomen eius Seth

₄et facti sunt dies Adam postquam genuit Seth octingenti anni

genuitque filios et filias

₅et factum est omne tempus quod vixit Adam anni nongenti triginta et mortuus est

₆vixit quoque Seth centum quinque annos et genuit Enos

₇vixitque Seth postquam genuit Enos octingentis septem annis

genuitque filios et filias

₈et facti sunt omnes dies Seth nongentorum duodecim annorum et mortuus est

₉vixit vero Enos nonaginta annis et genuit Cainan

₁₀post cuius ortum vixit octingentis quindecim annis

et genuit filios et filias

₁₁factique sunt omnes dies Enos nongentorum quinque annorum et mortuus est

₁₂vixit quoque Cainan septuaginta annis et genuit Malalehel

₁₃et vixit Cainan postquam genuit Malalehel octingentos quadraginta annos

genuitque filios et filias

₁₄et facti sunt omnes dies Cainan nongenti decem anni et mortuus est

₁₅vixit autem Malalehel sexaginta quinque annos et genuit Iared

₁₆et vixit Malalehel postquam genuit Iared octingentis triginta annis

et genuit filios et filias

₁₇et facti sunt omnes dies Malalehel octingenti nonaginta quinque anni et mortuus est

₁₈vixitque Iared centum sexaginta duobus annis et genuit Enoch

₁₉et vixit Iared postquam genuit Enoch octingentos annos

et genuit filios et filias

₂₀et facti sunt omnes dies Iared nongenti sexaginta duo anni et mortuus est

₂₁porro Enoch vixit sexaginta quinque annis et genuit Mathusalam

₂₂et ambulavit Enoch cum Deo postquam genuit Mathusalam trecentis annis

et genuit filios et filias

₂₃et facti sunt omnes dies Enoch trecenti sexaginta quinque anni

₂₄ambulavitque cum Deo et non apparuit quia tulit eum Deus

₂₅vixit quoque Mathusalam centum octoginta septem annos et genuit Lamech

₂₆et vixit Mathusalam postquam genuit Lamech septingentos octoginta duos annos

et genuit filios et filias

₂₇et facti sunt omnes dies Mathusalae nongenti sexaginta novem anni et mortuus est

₂₈vixit autem Lamech centum octoginta duobus annis

et genuit filium ₂₉vocavitque nomen eius Noe dicens

iste consolabitur nos ab operibus et laboribus manuum nostrarum in terra cui maledixit Dominus

₃₀vixitque Lamech postquam genuit Noe quingentos nonaginta quinque annos

et genuit filios et filias

₃₁et facti sunt omnes dies Lamech septingenti septuaginta septem anni et mortuus est

₃₂Noe vero cum quingentorum esset annorum genuit Sem et Ham et Iafeth