LIBER GENESIS 50

₁quod cernens Ioseph ruit super faciem patris

flens et deosculans eum

₂praecepitque servis suis medicis ut aromatibus condirent patrem

₃quibus iussa explentibus transierunt quadraginta dies

iste quippe mos erat cadaverum conditorum

flevitque eum Aegyptus septuaginta diebus

₄et expleto planctus tempore

locutus est Ioseph ad familiam Pharaonis

si inveni gratiam in conspectu vestro loquimini in auribus Pharaonis

₅eo quod pater meus adiuraverit me dicens en morior

in sepulchro meo quod fodi mihi in terra Chanaan sepelies me

ascendam igitur et sepeliam patrem meum ac revertar

₆dixitque ei Pharao

ascende et sepeli patrem tuum sicut adiuratus es

₇quo ascendente ierunt cum eo omnes senes domus Pharaonis

cunctique maiores natu terrae Aegypti

₈domus Ioseph cum fratribus suis

absque parvulis et gregibus atque armentis

quae dereliquerant in terra Gessen

₉habuit quoque in comitatu currus et equites

et facta est turba non modica

₁₀veneruntque ad aream Atad quae sita est

trans Iordanem

ubi celebrantes exequias planctu magno atque vehementi

impleverunt septem dies

₁₁quod cum vidissent habitatores terrae Chanaan dixerunt

planctus magnus est iste Aegyptiis

et idcirco appellaverunt nomen loci illius Planctus

Aegypti

₁₂fecerunt ergo filii Iacob sicut praeceperat eis

₁₃et portantes eum in terram Chanaan

sepelierunt in spelunca duplici

quam emerat Abraham cum agro in possessionem sepulchri

ab Ephron Hettheo contra faciem Mambre

₁₄reversusque est Ioseph in Aegyptum

cum fratribus suis et omni comitatu

sepulto patre

₁₅quo mortuo timentes fratres eius et mutuo conloquentes

ne forte memor sit iniuriae quam passus est

et reddat nobis malum omne quod fecimus

₁₆mandaverunt ei

pater tuus praecepit nobis antequam moreretur

₁₇ut haec tibi verbis illius diceremus

obsecro ut obliviscaris sceleris fratrum tuorum

et peccati atque malitiae quam exercuerunt in te

nos quoque oramus

ut servis Dei patris tui dimittas iniquitatem hanc

quibus auditis flevit Ioseph

₁₈veneruntque ad eum fratres sui

et proni in terram

dixerunt

servi tui sumus

₁₉quibus ille respondit nolite timere

num Dei possumus rennuere voluntatem

₂₀vos cogitastis de me malum et Deus vertit illud in bonum

ut exaltaret me sicut inpraesentiarum cernitis

et salvos faceret multos populos

₂₁nolite metuere ego pascam vos et parvulos vestros

consolatusque est eos et blande ac leniter est locutus

₂₂et habitavit in Aegypto cum omni domo patris sui

vixitque centum decem annis

et vidit Ephraim filios usque ad tertiam generationem

filii quoque Machir filii Manasse nati sunt in genibus

Ioseph

₂₃quibus transactis locutus est fratribus suis

post mortem meam Deus visitabit vos

et ascendere faciet de terra ista

ad terram quam iuravit Abraham Isaac et Iacob

₂₄cumque adiurasset eos atque dixisset Deus visitabit vos

asportate vobiscum ossa mea de loco isto

₂₅mortuus est expletis centum decem vitae suae annis

et conditus aromatibus repositus est in loculo in Aegypto