AD HEBRAEOS 12

₁ideoque et nos tantam habentes inpositam nubem testium

deponentes omne pondus et circumstans nos peccatum

per patientiam curramus propositum nobis certamen

₂aspicientes in auctorem fidei et consummatorem Iesum

qui pro proposito sibi gaudio sustinuit crucem

confusione contempta

atque in dextera sedis Dei sedit

₃recogitate enim eum

qui talem sustinuit a peccatoribus adversum semet ipsos contradictionem

ut ne fatigemini animis vestris deficientes

₄nondum usque ad sanguinem restitistis

adversus peccatum repugnantes

₅et obliti estis consolationis

quae vobis tamquam filiis loquitur dicens

fili mi noli neglegere disciplinam Domini

neque fatigeris dum ab eo argueris

₆quem enim diligit Dominus castigat

flagellat autem omnem filium quem recipit

₇in disciplina perseverate

tamquam filiis vobis offert Deus

quis enim filius quem non corripit pater

₈quod si extra disciplinam estis cuius participes facti sunt omnes

ergo adulteri et non filii estis

₉deinde patres quidem carnis nostrae habuimus eruditores

et reverebamur

non multo magis obtemperabimus Patri spirituum

et vivemus

₁₀et illi quidem in tempore paucorum dierum

secundum voluntatem suam erudiebant nos

hic autem ad id quod utile est in recipiendo sanctificationem eius

₁₁omnis autem disciplina in praesenti quidem videtur non esse gaudii sed

maeroris

postea autem fructum pacatissimum exercitatis per eam reddit iustitiae

₁₂propter quod remissas manus et soluta genua erigite

₁₃et gressus rectos facite pedibus vestris

ut non claudicans erret magis autem sanetur

₁₄pacem sequimini cum omnibus et sanctimoniam

sine qua nemo videbit Dominum

₁₅contemplantes ne quis desit gratiae Dei

ne qua radix amaritudinis sursum germinans inpediat

et per illam inquinentur multi

₁₆ne quis fornicator aut profanus ut Esau

qui propter unam escam vendidit primitiva sua

₁₇scitote enim quoniam et postea

cupiens hereditare benedictionem reprobatus est

non enim invenit paenitentiae locum

quamquam cum lacrimis inquisisset eam

₁₈non enim accessistis ad tractabilem et accensibilem

ignem

et turbinem et caliginem et procellam

₁₉et tubae sonum et vocem verborum

quam qui audierunt excusaverunt se ne eis fieret verbum

₂₀non enim portabant quod dicebatur

et si bestia tetigerit montem lapidabitur

₂₁et ita terribile erat quod videbatur

Moses dixit exterritus sum et tremebundus

₂₂sed accessistis ad Sion montem

et civitatem Dei viventis Hierusalem caelestem

et multorum milium angelorum frequentiae

₂₃et ecclesiam primitivorum qui conscripti sunt in caelis

et iudicem omnium Deum et spiritus iustorum perfectorum

₂₄et testamenti novi mediatorem Iesum

et sanguinis sparsionem melius

loquentem quam Abel

₂₅videte ne recusetis loquentem

si enim illi non effugerunt

recusantes eum qui super terram loquebatur

multo magis nos

qui de caelis loquentem nobis avertimur

₂₆cuius vox movit terram tunc

modo autem repromittit dicens

adhuc semel ego movebo non solum terram sed et caelum

₂₇quod autem adhuc semel dicit

declarat mobilium translationem tamquam factorum

ut maneant ea quae sunt inmobilia

₂₈itaque regnum inmobile suscipientes

habemus gratiam per quam serviamus placentes Deo

cum metu et reverentia

₂₉etenim Deus noster ignis consumens est