EPISTULA IACOBI 1

₁Iacobus Dei et Domini nostri Iesu Christi servus

duodecim tribubus quae sunt in dispersione salutem

₂omne gaudium existimate fratres mei

cum in temptationibus variis incideritis

₃scientes quod probatio fidei vestrae patientiam operatur

₄patientia autem opus perfectum habeat

ut sitis perfecti et integri in nullo deficientes

₅si quis autem vestrum indiget sapientiam

postulet a Deo qui dat omnibus affluenter et non inproperat

et dabitur ei

₆postulet autem in fide nihil haesitans

qui enim haesitat similis est fluctui maris

qui a vento movetur et circumfertur

₇non ergo aestimet homo ille quod accipiat aliquid a Domino

₈vir duplex animo

inconstans in omnibus viis suis

₉glorietur autem frater humilis in exaltatione sua

₁₀dives autem in humilitate sua

quoniam sicut flos faeni transibit

₁₁exortus est enim sol cum ardore et arefecit faenum

et flos eius decidit et decor vultus eius deperiit

ita et dives in itineribus suis marcescet

₁₂beatus vir qui suffert temptationem

quia cum probatus fuerit accipiet coronam vitae

quam repromisit Deus diligentibus se

₁₃nemo cum temptatur dicat quoniam a Deo temptor

Deus enim intemptator malorum est ipse autem neminem temptat

₁₄unusquisque vero temptatur a concupiscentia sua abstractus et inlectus

₁₅dein concupiscentia cum conceperit parit

peccatum

peccatum vero cum consummatum fuerit generat mortem

₁₆nolite itaque errare fratres mei dilectissimi

₁₇omne datum optimum et omne donum perfectum desursum est

descendens a Patre luminum

apud quem non est transmutatio nec vicissitudinis obumbratio

₁₈voluntarie genuit nos verbo veritatis

ut simus initium aliquod creaturae eius

₁₉scitis fratres mei dilecti

sit autem omnis homo velox ad audiendum

tardus autem ad loquendum

et tardus ad iram

₂₀ira enim viri iustitiam Dei non operatur

₂₁propter quod abicientes omnem inmunditiam

et abundantiam malitiae

in mansuetudine suscipite insitum verbum

quod potest salvare animas vestras

₂₂estote autem factores verbi et non auditores tantum

fallentes vosmet ipsos

₂₃quia si quis auditor est verbi et non factor

hic conparabitur viro consideranti vultum nativitatis suae in speculo

₂₄consideravit enim se et abiit et statim oblitus est qualis fuerit

₂₅qui autem perspexerit in lege perfecta

libertatis

et permanserit

non auditor obliviosus factus sed factor operis

hic beatus in facto suo erit

₂₆si quis autem putat se religiosum esse

non refrenans linguam suam sed seducens cor suum

huius vana est religio

₂₇religio munda et inmaculata apud Deum et Patrem haec est

visitare pupillos et viduas in tribulatione eorum

inmaculatum se custodire ab hoc saeculo