APOCALYPSIS IOHANNIS 12

₁et signum magnum paruit in caelo

mulier amicta sole et luna sub pedibus eius

et in capite eius corona stellarum duodecim

₂et in utero habens et clamat parturiens

et cruciatur ut pariat

₃et visum est aliud signum in caelo

et ecce draco magnus rufus habens capita septem et cornua decem

et in capitibus suis septem diademata

₄et cauda eius trahebat tertiam partem stellarum caeli

et misit eas in terram

et draco stetit ante mulierem quae erat paritura

ut cum peperisset filium eius devoraret

₅et peperit filium masculum

qui recturus erit omnes gentes in virga ferrea

et raptus est filius eius ad Deum et ad thronum eius

₆et mulier fugit in solitudinem

ubi habet locum paratum a Deo

ut ibi pascant illam diebus mille ducentis sexaginta

₇et factum est proelium in caelo

Michahel et angeli eius proeliabantur cum dracone

et draco pugnabat et angeli eius

₈et non valuerunt

neque locus inventus est eorum amplius in caelo

₉et proiectus est draco ille magnus serpens antiquus

qui vocatur Diabolus et Satanas

qui seducit universum orbem

proiectus est in terram et angeli eius cum illo missi sunt

₁₀et audivi vocem magnam in caelo dicentem

nunc facta est salus et virtus et regnum Dei nostri

et potestas Christi eius

quia proiectus est accusator fratrum nostrorum

qui accusabat illos ante conspectum Dei nostri die ac

nocte

₁₁et ipsi vicerunt illum propter sanguinem agni

et propter verbum testimonii sui

et non dilexerunt animam suam usque ad mortem

₁₂propterea laetamini caeli et qui habitatis in eis

vae terrae et mari quia descendit diabolus ad vos

habens iram magnam sciens quod modicum tempus habet

₁₃et postquam vidit draco quod proiectus est in terram

persecutus est mulierem quae peperit masculum

₁₄et datae sunt mulieri duae alae aquilae magnae

ut volaret in desertum in locum suum

ubi alitur per tempus et tempora et dimidium temporis a facie serpentis

₁₅et misit serpens ex ore suo post mulierem aquam tamquam flumen ut eam faceret trahi a flumine

₁₆et adiuvit terra mulierem et aperuit terra os suum et absorbuit flumen quod misit draco de ore suo

₁₇et iratus est draco in mulierem

et abiit facere proelium cum reliquis de semine eius

qui custodiunt mandata Dei et habent testimonium Iesu

₁₈et stetit super harenam maris