APOCALYPSIS IOHANNIS 13

₁et vidi de mare bestiam ascendentem

habentem capita septem et cornua decem

et super cornua eius decem diademata

et super capita eius nomina blasphemiae

₂et bestiam quam vidi similis erat pardo

et pedes eius sicut ursi et os eius sicut os leonis

et dedit illi draco virtutem suam et potestatem magnam

₃et unum de capitibus suis quasi occisum in

mortem

et plaga mortis eius curata est

et admirata est universa terra post bestiam

₄et adoraverunt draconem quia dedit potestatem bestiae

et adoraverunt bestiam dicentes

quis similis bestiae et quis poterit pugnare cum ea

₅et datum est ei os loquens magna et

blasphemiae

et data est illi potestas

facere menses quadraginta duo

₆et aperuit os suum in blasphemias ad Deum

blasphemare nomen eius

et tabernaculum eius et eos qui in caelo habitant

₇et datum est illi bellum facere cum sanctis

et vincere illos

et data est ei potestas in omnem tribum et populum

et linguam et gentem

₈et adorabunt eum omnes qui inhabitant

terram

quorum non sunt scripta nomina in libro vitae agni

qui occisus est ab origine mundi

₉si quis habet aurem audiat

₁₀qui in captivitatem in captivitatem vadit

qui in gladio occiderit oportet eum gladio occidi

hic est patientia et fides sanctorum

₁₁et vidi aliam bestiam ascendentem de terra

et habebat cornua duo similia agni et loquebatur sicut draco

₁₂et potestatem prioris bestiae omnem faciebat in conspectu eius

et facit terram et inhabitantes in

eam

adorare bestiam primam cuius curata est plaga mortis

₁₃et fecit signa magna

ut etiam ignem faceret de caelo descendere in terram

in conspectu hominum

₁₄et seducit habitantes terram

propter signa quae data sunt illi facere in conspectu bestiae

dicens habitantibus in terra

ut faciant imaginem bestiae quae habet plagam gladii et vixit

₁₅et datum est illi ut daret spiritum imagini bestiae

ut et loquatur imago bestiae

et faciat quicumque non adoraverint

imaginem bestiae occidantur

₁₆et faciet omnes pusillos et magnos

et divites et pauperes et liberos et servos

habere caracter in dextera manu

aut in frontibus suis

₁₇et ne quis possit emere aut vendere

nisi qui habet caracter

nomen bestiae

aut numerum nominis eius

₁₈hic sapientia est

qui habet intellectum conputet numerum bestiae

numerus enim hominis est

et numerus eius est sescenti sexaginta sex