APOCALYPSIS IOHANNIS 15

₁et vidi aliud signum in caelo magnum et mirabile

angelos septem habentes plagas septem novissimas

quoniam in illis consummata est ira Dei

₂et vidi tamquam mare vitreum mixtum igne

et eos qui vicerunt bestiam et imaginem illius

et numerum nominis eius

stantes supra mare vitreum habentes citharas Dei

₃et cantant canticum Mosi servi Dei

et canticum agni dicentes

magna et mirabilia opera tua Domine Deus omnipotens

iustae et verae viae tuae rex saeculorum

₄quis non timebit Domine

et magnificabit nomen tuum

quia solus pius

quoniam omnes gentes venient et adorabunt in conspectu tuo

quoniam iudicia tua manifestata sunt

₅et post haec vidi

et ecce apertum est templum tabernaculi testimonii in caelo

₆et exierunt septem angeli habentes septem plagas de templo

vestiti lapide mundo candido

et praecincti circa pectora zonis aureis

₇et unus ex quattuor animalibus

dedit septem angelis septem fialas aureas

plenas iracundiae Dei viventis in saecula saeculorum

₈et impletum est templum fumo a maiestate Dei et de virtute eius

et nemo poterat introire in templum

donec consummarentur septem plagae septem angelorum