APOCALYPSIS IOHANNIS 16

₁et audivi vocem magnam de templo dicentem septem angelis

ite et effundite septem fialas irae Dei in terram

₂et abiit primus et effudit fialam suam in terram

et factum est vulnus saevum ac pessimum in homines

qui habent caracterem bestiae

et eos qui adoraverunt imaginem eius

₃et secundus effudit fialam suam in mare

et factus est sanguis tamquam mortui

et omnis anima vivens mortua est in mari

₄et tertius effudit fialam suam super flumina et super fontes aquarum

et factus est sanguis

₅et audivi angelum aquarum dicentem

iustus es qui es et qui eras sanctus

quia haec iudicasti

₆quia sanguinem sanctorum et prophetarum fuderunt

et sanguinem eis dedisti bibere digni sunt

₇et audivi altare dicens

etiam Domine Deus omnipotens vera et iusta iudicia tua

₈et quartus effudit fialam suam in solem

et datum est illi aestu adficere homines et igni

₉et aestuaverunt homines aestu magno

et blasphemaverunt nomen Dei

habentis potestatem super has plagas

neque egerunt paenitentiam ut darent illi gloriam

₁₀et quintus effudit fialam suam super sedem bestiae

et factum est regnum eius tenebrosum

et conmanducaverunt linguas suas prae dolore

₁₁et blasphemaverunt Deum caeli

prae doloribus et vulneribus suis

et non egerunt paenitentiam ex operibus suis

₁₂et sextus effudit fialam suam in flumen illud magnum

Eufraten

et siccavit aquam eius

ut praepararetur via regibus ab ortu solis

₁₃et vidi de ore draconis et de ore bestiae et de ore pseudoprophetae

spiritus tres inmundos in modum ranarum

₁₄sunt enim spiritus daemoniorum facientes signa

et procedunt ad reges totius terrae

congregare illos in proelium

ad diem magnum Dei omnipotentis

₁₅ecce venio sicut fur

beatus qui vigilat et custodit vestimenta sua

ne nudus ambulet et videant turpitudinem eius

₁₆et congregavit illos in locum

qui vocatur hebraice Hermagedon

₁₇et septimus effudit fialam suam in aerem

et exivit vox magna de templo a throno dicens factum est

₁₈et facta sunt fulgora et voces et tonitrua

et terraemotus factus est magnus

qualis numquam fuit ex quo homines fuerunt super terram

talis terraemotus sic magnus

₁₉et facta est civitas magna in tres partes

et civitates gentium ceciderunt

et Babylon magna venit in memoriam ante Deum

dare ei calicem vini indignationis irae eius

₂₀et omnis insula fugit et montes non sunt inventi

₂₁et grando magna sicut talentum descendit de caelo in homines

et blasphemaverunt homines Deum propter plagam grandinis

quoniam magna facta est vehementer