APOCALYPSIS IOHANNIS 17

₁et venit unus de septem angelis qui habebant septem fialas

et locutus est mecum dicens

veni ostendam tibi damnationem meretricis magnae

quae sedet super aquas multas

₂cum qua fornicati sunt reges terrae

et inebriati sunt qui inhabitant terram de vino prostitutionis eius

₃et abstulit me in desertum in spiritu

et vidi mulierem sedentem super bestiam coccineam

plenam nominibus blasphemiae

habentem capita septem et cornua decem

₄et mulier erat circumdata purpura et coccino

et inaurata auro et lapide pretioso et margaritis

habens poculum aureum in manu sua

plenum abominationum et inmunditia

fornicationis eius

₅et in fronte eius nomen scriptum mysterium

Babylon magna mater fornicationum et abominationum terrae

₆et vidi mulierem ebriam de sanguine sanctorum

et de sanguine martyrum Iesu

et miratus sum cum vidissem illam admiratione magna

₇et dixit mihi angelus quare miraris

ego tibi dicam sacramentum mulieris et bestiae quae portat

eam

quae habet capita septem et decem cornua

₈bestiam quam vidisti fuit et non est

et ascensura est de abysso et in interitum ibit

et mirabuntur inhabitantes terram

quorum non sunt scripta nomina in libro vitae a constitutione mundi

videntes bestiam quia erat et non est

₉et hic est sensus qui habet sapientiam

septem capita septem montes sunt super quos mulier sedet

et reges septem sunt

₁₀quinque ceciderunt unus est alius nondum venit

et cum venerit oportet illum breve tempus manere

₁₁et bestia quae erat et non est

et ipsa octava est et de septem est et in interitum vadit

₁₂et decem cornua quae vidisti decem reges sunt

qui regnum nondum acceperunt

sed potestatem tamquam reges una hora accipiunt

post bestiam

₁₃hii unum consilium habent

et virtutem et potestatem suam bestiae tradunt

₁₄hii cum agno pugnabunt et agnus vincet illos

quoniam Dominus dominorum est et rex regum

et qui cum illo sunt vocati et electi et fideles

₁₅et dixit mihi

aquas quas vidisti ubi meretrix sedet

populi sunt et gentes et linguae

₁₆et decem cornua quae vidisti et bestiam

hii odient fornicariam et desolatam facient illam et nudam

et carnes eius manducabunt et ipsam igni concremabunt

₁₇Deus enim dedit in corda eorum

ut faciant quod illi placitum est

ut dent regnum suum bestiae donec consummentur verba Dei

₁₈et mulier quam vidisti est civitas magna

quae habet regnum super reges terrae