APOCALYPSIS IOHANNIS 2

₁angelo Ephesi ecclesiae scribe

haec dicit qui tenet septem stellas in dextera sua

qui ambulat in medio septem candelabrorum aureorum

₂scio opera tua et laborem et patientiam tuam

et quia non potes sustinere malos

et temptasti eos qui se dicunt apostolos

et non sunt

et invenisti eos mendaces

₃et patientiam habes

et sustinuisti propter nomen meum et non defecisti

₄sed habeo adversus te

quod caritatem tuam primam reliquisti

₅memor esto itaque unde excideris et age paenitentiam

et prima opera fac

sin autem venio tibi et movebo candelabrum tuum de loco suo

nisi paenitentiam egeris

₆sed hoc habes quia odisti facta Nicolaitarum quae et ego odi

₇qui habet aurem audiat quid Spiritus dicat ecclesiis

vincenti dabo ei edere de ligno vitae

quod est in paradiso Dei mei

₈et angelo Zmyrnae ecclesiae scribe

haec dicit primus et novissimus qui fuit mortuus et vivit

₉scio tribulationem tuam et paupertatem tuam sed dives es

et blasphemaris ab his qui se dicunt Iudaeos esse

et non sunt sed sunt synagoga Satanae

₁₀nihil horum timeas quae passurus es

ecce missurus est diabolus ex vobis in carcerem ut

temptemini

et habebitis tribulationem diebus decem

esto fidelis usque ad mortem et dabo tibi coronam vitae

₁₁qui habet aurem audiat quid Spiritus dicat ecclesiis

qui vicerit non laedetur a morte secunda

₁₂et angelo Pergami ecclesiae scribe

haec dicit qui habet rompheam utraque parte acutam

₁₃scio ubi habitas ubi sedes est Satanae

et tenes nomen meum et non negasti fidem meam

et in diebus Antipas testis meus fidelis

qui occisus est apud vos ubi Satanas habitat

₁₄sed habeo adversus te pauca

quia habes illic tenentes doctrinam Balaam

qui docebat Balac mittere scandalum coram filiis Israhel

edere et fornicari

₁₅ita habes et tu tenentes doctrinam Nicolaitarum

₁₆similiter paenitentiam age

si quo minus venio tibi cito

et pugnabo cum illis in gladio oris mei

₁₇qui habet aurem audiat quid Spiritus dicat ecclesiis

vincenti dabo ei manna absconditum

et dabo illi calculum candidum

et in calculo nomen novum scriptum

quod nemo scit nisi qui accipit

₁₈et angelo Thyatirae ecclesiae scribe haec dicit Filius Dei

qui habet oculos ut flammam ignis

et pedes eius similes orichalco

₁₉novi opera tua et caritatem et fidem

et ministerium et patientiam tuam

et opera tua novissima plura prioribus

₂₀sed habeo adversus te

quia permittis mulierem Hiezabel quae se dicit propheten

docere et seducere servos meos fornicari

et manducare de idolothytis

₂₁et dedi illi tempus ut paenitentiam ageret

et non vult paeniteri a fornicatione sua

₂₂ecce mitto eam in lectum

et qui moechantur cum ea in tribulationem maximam

nisi paenitentiam egerint ab operibus eius

₂₃et filios eius interficiam in morte

et scient omnes ecclesiae quia ego sum scrutans renes et corda

et dabo unicuique vestrum secundum opera vestra

₂₄vobis autem dico ceteris qui Thyatirae estis

quicumque non habent doctrinam hanc

qui non cognoverunt altitudines Satanae quemadmodum dicunt

non mittam super vos aliud pondus

₂₅tamen id quod habetis tenete donec veniam

₂₆et qui vicerit et qui custodierit usque in finem opera mea

dabo illi potestatem super gentes

₂₇et reget illas in virga ferrea

tamquam vas figuli confringentur

₂₈sicut et ego accepi a Patre meo

et dabo illi stellam matutinam

₂₉qui habet aurem audiat quid Spiritus dicat ecclesiis