APOCALYPSIS IOHANNIS 3

₁et angelo ecclesiae Sardis scribe

haec dicit qui habet septem spiritus Dei et septem stellas

scio opera tua quia nomen habes quod vivas et mortuus es

₂esto vigilans et confirma cetera quae moritura erant

non enim invenio opera tua plena coram Deo meo

₃in mente ergo habe qualiter acceperis et audieris

et serva et paenitentiam age

si ergo non vigilaveris veniam tamquam fur

et nescies qua hora veniam ad te

₄sed habes pauca nomina in Sardis

qui non inquinaverunt vestimenta sua

et ambulabunt mecum in albis quia digni sunt

₅qui vicerit sic vestietur vestimentis albis

et non delebo nomen eius de libro vitae

et confitebor nomen eius coram Patre meo et coram angelis eius

₆qui habet aurem audiat quid Spiritus dicat ecclesiis

₇et angelo Philadelphiae ecclesiae scribe

haec dicit sanctus et verus qui habet clavem David

qui aperit et nemo cludit et cludit et nemo aperit

₈scio opera tua

ecce dedi coram te ostium apertum quod nemo potest cludere

quia modicam habes virtutem

et servasti verbum meum et non negasti nomen meum

₉ecce dabo de synagoga Satanae

qui dicunt se Iudaeos esse et non sunt sed mentiuntur

ecce faciam illos ut veniant et adorent ante pedes tuos

et scient quia ego dilexi te

₁₀quoniam servasti verbum patientiae meae

et ego te servabo ab hora temptationis

quae ventura est in orbem universum

temptare habitantes in terra

₁₁venio cito

tene quod habes ut nemo accipiat coronam tuam

₁₂qui vicerit faciam illum columnam in templo Dei mei

et foras non egredietur amplius

et scribam super eum nomen Dei mei

et nomen civitatis Dei mei novae Hierusalem

quae descendit de caelo a Deo meo

et nomen meum novum

₁₃qui habet aurem audiat quid Spiritus dicat ecclesiis

₁₄et angelo Laodiciae ecclesiae scribe

haec dicit Amen testis fidelis et verus

qui est principium creaturae Dei

₁₅scio opera tua quia neque frigidus es neque calidus

utinam frigidus esses aut calidus

₁₆sed quia tepidus es et nec frigidus nec calidus

incipiam te evomere ex ore meo

₁₇quia dicis quod dives sum et locupletatus et nullius egeo

et nescis quia tu es miser et miserabilis

et pauper et caecus et nudus

₁₈suadeo tibi emere a me aurum ignitum probatum ut locuples fias

et vestimentis albis induaris

et non appareat confusio nuditatis tuae

et collyrio inungue oculos tuos ut videas

₁₉ego quos amo arguo et castigo

aemulare ergo et paenitentiam age

₂₀ecce sto ad ostium et pulso

si quis audierit vocem meam et aperuerit ianuam

introibo ad illum et cenabo cum illo et ipse mecum

₂₁qui vicerit dabo ei sedere mecum in throno meo

sicut et ego vici et sedi cum Patre meo in throno eius

₂₂qui habet aurem audiat quid Spiritus dicat ecclesiis