APOCALYPSIS IOHANNIS 4

₁post haec vidi et ecce ostium apertum in caelo

et vox prima quam audivi tamquam tubae loquentis mecum dicens

ascende huc et ostendam tibi quae oportet fieri post haec

₂statim fui in spiritu

et ecce sedis posita erat in caelo

et supra sedem sedens

₃et qui sedebat similis erat aspectui lapidis iaspidis et sardini

et iris erat in circuitu sedis similis visioni zmaragdinae

₄et in circuitu sedis sedilia viginti quattuor

et super thronos viginti quattuor seniores sedentes

circumamictos vestimentis albis

et in capitibus eorum coronas aureas

₅et de throno procedunt fulgura et voces et tonitrua

et septem lampades ardentes ante thronum

quae sunt septem spiritus Dei

₆et in conspectu sedis tamquam mare vitreum simile cristallo

et in medio sedis et in circuitu sedis

quattuor animalia plena oculis ante et retro

₇et animal primum simile leoni

et secundum animal simile vitulo

et tertium animal habens faciem quasi hominis

et quartum animal simile aquilae volanti

₈et quattuor animalia singula eorum habebant alas senas

et in circuitu et intus plena sunt oculis

et requiem non habent die et nocte dicentia

sanctus sanctus sanctus Dominus Deus omnipotens

qui erat et qui est et qui venturus est

₉et cum darent illa animalia gloriam et honorem et benedictionem

sedenti super thronum viventi in saecula saeculorum

₁₀procident viginti quattuor seniores

ante sedentem in throno

et adorabunt viventem in saecula saeculorum

et mittent coronas suas ante thronum dicentes

₁₁dignus es Domine et Deus noster

accipere gloriam et honorem et virtutem

quia tu creasti omnia

et propter voluntatem tuam erant et creata sunt