AD TITUM 2

₁tu autem loquere quae decet sanam doctrinam

₂senes ut sobrii sint pudici prudentes

sani fide dilectione patientia

₃anus similiter in habitu sancto non criminatrices

non vino multo servientes

bene docentes

₄ut prudentiam doceant

adulescentulas ut viros suos ament filios diligant

₅prudentes castas

domus curam habentes

benignas subditas suis viris

ut non blasphemetur verbum Dei

₆iuvenes similiter hortare ut sobrii sint

₇in omnibus te ipsum praebe exemplum bonorum operum

in doctrina integritatem

gravitatem

₈verbum sanum inreprehensibilem

ut is qui ex adverso est vereatur

nihil habens malum dicere de nobis

₉servos dominis suis subditos esse in omnibus

placentes non contradicentes

₁₀non fraudantes sed in omnibus fidem bonam ostendentes

ut doctrinam salutaris nostri Dei ornent in omnibus

₁₁apparuit enim gratia Dei salutaris omnibus hominibus

₁₂erudiens nos ut abnegantes impietatem et saecularia desideria

sobrie et iuste et pie vivamus in hoc saeculo

₁₃expectantes beatam spem et adventum gloriae

magni Dei et salvatoris nostri Iesu Christi

₁₄qui dedit semet ipsum pro nobis

ut nos redimeret ab omni iniquitate

et mundaret sibi populum acceptabilem

sectatorem bonorum operum

₁₅haec loquere et exhortare et argue cum omni imperio

nemo te contemnat