PSALMI IUXTA LXX 91

₂Bonum est confiteri Domino et psallere nomini tuo Altissime

₃ad adnuntiandum mane misericordiam tuam

et veritatem tuam per noctem

₄in decacordo psalterio cum cantico in cithara

₅quia delectasti me Domine in factura tua

et in operibus manuum tuarum exultabo

₆quam magnificata sunt opera tua Domine

nimis profundae factae sunt cogitationes tuae

₇vir insipiens non cognoscet et stultus non intelleget haec

₈cum exorti fuerint peccatores sicut faenum

et apparuerint omnes qui operantur iniquitatem

ut intereant in saeculum ÷saeculi:

₉tu autem Altissimus in aeternum Domine

₁₀※quoniam ecce inimici tui Domine:

quoniam ecce inimici tui peribunt

et dispergentur omnes qui operantur iniquitatem

₁₁et exaltabitur sicut unicornis cornu meum

et senectus mea in misericordia uberi

₁₂et despexit oculus meus inimicis meis

et insurgentibus in me malignantibus audiet auris mea

₁₃iustus ut palma florebit ut cedrus Libani multiplicabitur

₁₄plantati in domo Domini in atriis Dei nostri florebunt

₁₅adhuc multiplicabuntur in senecta uberi

et bene patientes erunt

₁₆ut adnuntient

quoniam rectus Dominus Deus noster et non est iniquitas in eo